He hua toi hōkaka, he mihi ki te ao irakē-wāhine

Updated: Sep 15, 2021

Nā te ringatoi nei, nā Imogen Taylor, ngā hua hiatākaro, marere hoki, me te tino irakē tonu. I kōrero ia ki a Claire O’Loughlin.


Imogen Taylor. Portrait by Sanne Van Ginkle

He tae kitakita, he āhuahanga kōpio e tāwhanawhana ana, e kōpikopiko ana i runga i te tino whakangāwari, manohi anō, he rārangi pīrata, e kotiti ana i runga i te kakano matara - e wiriwiri hoki ana ngā waituhi tūrehurehu a Imogen Taylor me te ārohirohi hihiko, manioro hoki. Panapana ana, tīkorikori ana hoki ērā. Arā ētahi kānawehi me tōna hanga tapawhā whakarara anō, e tītaha ana ēnei mahi toi kia whanokē ai te noho, engari he māia tonu ērā. Inā te rerekē me te tīwekaweka, ka kaha rangona te irakētanga e puaki mai ana nō roto.


E ai ki a Taylor, he kaupapa te irakētanga e rere kē ana nei i ngā tikanga rorotu a te marea. “Nōku e waituhi ana, he rite tonu taku urupare ki ngā wā kua taka iho, me taku ātete ki tēnā, ki tēnā āhuatanga o ō tātou hītori.”


Mā ngā mahi toi anō ērā e kōrero ake, heoi mā te horopaki tonu e kīnaki i te whakapapa anō kia haumako ake ai. He rite tonu te ketuketu mai, te tūhura mai hoki a ā Imogen mahi i te toi hou me te irakētanga, waihoki, e uiui ana hoki i ōna tino whakaaweawe, a Georgia O’Keefe rāua ko Frances Hodgkins. “E rite tonu ana te whakatauritea āku mahi ki ā Hodgkins. Kei te kaha kauanuanu au ki tāna mahi, he korokē katoa.”


I Whangārei a Taylor, whānau mai ai, i te tau 1985, i tipu mai ia ki Kororāreka, ā, i neke atu ki a Tāmaki-makau-rau i te ngahurutau iwa-tekau. I mōhio mārika ia nō te wā kua rima tau noa tōna tamarikitanga he hiahia tōna kia mahi hei kaitoi, kātahi i tīmata ki te mahi tā. “He tino patanga nōku he mea whaimana te mahi toi i roto i taku whānau, hei umanga mā te tangata.”


Ko āna ngana toi tuatahi o tana pakeketanga he mea puoro. I tāpoi rātou ko tētahi ope puoro huri noa i te ao, me tana whakatangi pūtōrino. Ā moroki noa nei, ko te puoro tonu tētahi aweawe ki āna mahi- ina koa ko te puoro-manioro o te ao kaupapa-wāhine, me te kaupapa a Riot Grrrl. “Kei te rata au ki te katoa o ngā mea weriweri, hape, kōtītiti hoki,” ko tāna, “he rite tonu taku kimi i ngā hua anuanu.”


Imogen Taylor, "Refusal to yield", 2018.

Nā Te Kura Toi o Elam ia i akiaki, i whakapātari - ko tā Elam kaupapa he anga nō muri i te toi houtanga, ehara kē i te whakatewhatewha ōkawa. Nō tana whakapōtaetanga i te tau 2010 kua whakakitea āna mahi huri noa te motu nei, waihoki ki Te Whenua Moemoeā, ki Hong Kong hoki.


I te tau 2018 i riro i a Taylor te Wallace Arts Trust Paramount Award mō Refusal to Yield, ko tētahi hua kano pīngao, me tana muramura, whakaura hoki, he mihi ki ngā kaupapa toi Bauhaus, Matahuhua me te Toi Hou hoki. Ko te puiaki i riro i a ia ko tētahi nōhanga e ono marama te roa ki te International School and Curatorial Program ki Te Āporo Nui. I tinakutia tēnā kia mauminamina tana kanohi ki te Frances Hodgkins Fellowship ki te Whare Wānanga o Ōtākou, he kotahi tau te roa.


Nōna i Ōtākou, i whakatewhatewhatia e Taylor ngā kaupapa o te irakē me te rekareka i roto i ngā hua a ngā tohunga waituhi wāhine o te ao toi hou. I roto i tana whakaaturanga ki te Whare Toi Hocken, i urua ngā kōwaiwai nā Hodgkins rātou ko Dorothy Kate Richmond, ko A. Lois White, me te aha ka whakaemia ngā ringatoi wāhine tokowhā o Aotearoa nei, wānanga ai.


Ko te kōwaiwai a Hodgkins i tīpakona ai e ia ko Double Portrait, Friends (1992-3), ko tā Taylor ko tēnei pea te “hua tino irakē” a Hodgkins. Ka kitea he tokorua ngā wāhine e noho piritaha ana. Me te mea nei, e aumoe ana rāua, engari e konekone tonu ana hoki. He whakatōngā, he tūtakarerewa. Ko tā ētahi, e ngaki ana ki te mōhiohio ki a Hodgkins, nō Ngāi Uenuku ia, engari, i kore rawa i pērā tā Hodgkins mōna anō. Hei tā Taylor, kāore pea he hua tō te tautuhi i a ia. “Kua āraihia te mōhio- he pai ki a au te whakaute i taua ārai.”


Hei tā Taylor, kāore te irakētanga,i roto i ngā mahi a Hodgkins, i te hāngai ki tana aronga taera. E hāngai kē ana ki te kaha o te whanaungatanga ka rangona i ngā horopaki o ngāi irakē; o Hodgkins, ōna anō hoki; hei ipo, hei ringatoi, hei whānau hoki, whakatinanatia ai ngā tikanga o te mahi tahi, te tautoko, te awhi me te manaaki i roto i ēnei hapori – hei tauira ko Bloomsbury Group ki Ingarangi.


Imogen Taylor. Portrait by Sanne Van Ginkle

Ka ngākau whiwhita a Taylor ki ēnei hapori tautoko. Nā rāua ko Judith Darragh a Femisphere i hanga, ko tētahi pānui e whakatairanga ana i te “kotahitanga-ā-kanorau me te whakatairanga o ngā kaupapa toi-ataata wāhine* ki Aotearoa,” me te tikanga o te kupu “wāhine” e pēnei ana i te “ponitaka i te kāhui irahuhua e hono atu ana ki taua kupu.”


Mahi tahi ai hoki ia i te taha o te tau o tana ate, a Sue Hillary. Ko ētahi tauira o ā rāua mahi tahi ko ngā toi-puni nui e rua e urupare atu ana ki tā Hodgkin Double Portrait. Ko tā rāua mahi Double Portrait, Screw Thread, i whakakitea ki tana whakaaturanga Hocken, koia tētahi tōrino kōpikopiko e tāruarua ana, e whētuitui ana i a ia anō, he kahukura, he māwhero, he waiporoporo, he karaka hoki. Ka rangona te kotahitanga me te whanaungatanga, e pipiri ana te noho ānō nei e rarangahia ngātahi ana ngā aho motuhake kia taupiri ai te tāwhiwhi mō ake tonu atu.


I te 2020, i pōwhiritia te takirua nei e Te Pātaka Toi kia whanaketia tētahi mahi anō, hei uri o tā Hodgkin mahi. Ko te putanga he kōwaiwai-ā-pakitara, he āhuahanga nunui me tana ritenga ki ngā angaanga e rua, e pāroherohe ana te takoto taupiri, tāpae atu ai rāua i a rāua anō.


Heoi anō, i roto anake i tana whakaaturanga ināia tata ake nei, i Thirsty Work i te Whare Toi o Michael Lett, i rukua hōhonutia e ia te toi tūturu. He tino uha, he tino tinana, he tino karihika hoki ngā mahi pērā i a Al Fresco me Pervert.


He rawa taketake te tāpora māori o roto nei, he matū horihori te peita kiriaku, ko tā rāua taukumekume rāua i a rāua te whakatinanatanga o tētahi mauri takaoraora i roto i āna mahi.


Imogen Taylor, "Rock", "Pervert", "Soft Top" and "Bud".

Images courtesy of the artist and Michael Lett.


Hei papanga ko te tāpora nei he mihi ki ngā wāhine Bauhaus ka tahi, i runga i te āhuatanga he mea raranga tēnā. Kāore e whakaaetia ēnei wāhine te kuhu atu ki ngā taupuni mahi hanga rākau, hanga maitai hoki nō taua wā, nā, ko te raranga tā rātou kaupapa motuhake. Ka rua, he mihi hoki te tāpora ki te taiwhenua o Aotearoa i ngā ngahurutau o waenganui i te rau tau kua hipa nei. I taua wā, he nui nō te utu o ngā kānawehi ahu mai i Ūropi, nā ngā ringatoi pērā i a McCahon rāua ko Clairmont i waituhi ki te tāpora.


Koia tēnei te wā autaia mō te hanga i ngā kōwaiwai e hiahia ana ērā kia mātakihia ā-kanohi; i tēnei ao hurihuri nei ka kaha mātakihia ā-mariko. Kei te heke haere te minenga e kuhu ana ā-tinana ki ngā whare toi, i te wā tonu e piki haere ana ngā paenga-titiro ā-tuihono, ehara i te KOWHEORI anake te take. Ka whakaaroaro ana a Taylor ki ngā kawekawe, hei roto i ngā tau, o te titiro ā-ipurangi noa, ki te mātau o te iwi ki ngā āhuatanga ōkiko o te mahi toi ka tahi, me te whakapeto ngoi a te tukanga ka rua.


Ko tā Taylor kaupapa ko te hoatu i āna hua toi ki ngā kaimātakitaki, kia whakaarohia ō rātou ake whakaaro. “Koirā tētahi o ngā painga o Elam – nā te kura rā i whakaako mai, mā te kaimātaki tonu te mahi e whakaoti, māu noa e hoatu ki a ia.”


Haere ake nei, ko tētahi rerenga hou o Femisphere e puta mai ana, ā-tuihono hei tēnei wā. Hei te wā ka taea e Taylor, e hiahia ana ia ki te whakaoti i tana nōhanga ki Te Āporo Nui – i whakapauria te marama kotahi anake i te tau 2020 i mua atu i haukoti a te KOWHEORI i te kaupapa. Mō te wā nei, kei te hoki ia ki te taupuni mahi, whakaaro ai, waihanga ai.


“Ko tōku tino tumanako mō āku mahi kia hianga, kia karihika, kia nēnene. He rite tonu taku nako kia māhorahora, kia marae, kia wairua marere hoki.”


 

I whakamāoritia tēnei kōrero e Bea Joblin

Sanne Van Ginkel te whakaahua kiritangata


This story is available in English. Read it here.